ವಿವೇಕ್ ಶಾನಭಾಗರ ಹೊಸ ಕಥಾ ಸಂಕಲನ `ಮತ್ತೊಬ್ಬನ ಸಂಸಾರ'

ವಿವೇಕ್ ಶಾನಭಾಗರ `ಮತ್ತೊಬ್ಬನ ಸಂಸಾರ' ಕಥಾಸಂಕಲನ ಈ ಭಾನುವಾರ ಡಿಸೆಂಬರ್ ೧೧ರಂದು ಅಂಕಿತ ಪುಸ್ತಕಾಲಯದಲ್ಲಿ ಬಿಡುಗಡೆಯಾಯಿತು. ಕಾರ್ಯಕ್ರಮದಲ್ಲಿ ಎಲ್ಲವೂ ಚುಟುಕಾಗಿತ್ತು. ಸ್ಥಳ, ಅವಧಿ, ಮಾತುಗಳು ಎಲ್ಲವೂ. ಬರಹಗಾರರು, ಸಾಹಿತ್ಯ ಪೋಷಕರು, ಓದುಗರು ಎಲ್ಲರಿಂದ ಕಿಕ್ಕಿರಿದು ತುಂಬಿತ್ತು ಪುಟ್ಟ ಅಂಕಿತ್. ಪುಸ್ತಕ-ಬಿಡುಗಡೆಯ ನಂತರ "ಎಲ್ಲಾ ಕ್ಷೇತ್ರದ, ಎಲ್ಲಾ ಹಿನ್ನೆಲೆಯ ಅನಾಮಿಕನೂ ಓದಬಯಸುವ ಲೇಖಕ ವಿವೇಕ್" ಎಂದವರು ಜಯಂತ್ ಕಾಯ್ಕಿಣಿ. ಸಾಹಿತ್ಯದ ಬಗ್ಗೆ ಏನೂ ಗೊತ್ತಿಲ್ಲದವರಂತೆ ಇರಬಯಸುವ ತಮ್ಮ ವಿಶಿಷ್ಟ ಅಲೆಮಾರಿ ನೆಲೆಯಲ್ಲಿ ನವಿರು ಹಾಸ್ಯ ತುಂಬಿ ಮಾತಾಡಿದ ಅಬ್ದುಲ್ ರಶೀದ್ ಪ್ರೇಕ್ಷಕರ ಮೆಚ್ಚುಗೆ ಗಳಿಸಿದ್ದಲ್ಲದೆ ಅಂಕಿತ್ ಪ್ರಕಾಶನದ ಪ್ರಕಾಶ್ ಕಂಭತ್ತಳ್ಳಿ ಅವರಿಂದ ತಮ್ಮ ಬರಹಗಳನ್ನೂ ಪ್ರಕಟಿಸುವುದಾಗಿ ಮಾತುಗಿಟ್ಟಿಸಿಕೊಳ್ಳುವಲ್ಲಿ ಯಶಸ್ವಿಯಾದರು. ಅಷ್ಟೇ ಚುಟುಕಾಗಿ ಮಾತನಾಡಿದ ವಿವೇಕ್ ಇದೇ ಮೊದಲ ಬಾರಿ ಅವರ ಪುಸ್ತಕ ಪ್ರಕಟಿಸುತ್ತಿರುವ ಅಂಕಿತ್ ಪ್ರಕಾಶನದವರಿಗೆ ಮನ್ನಣೆ ಸಲ್ಲಿಸುತ್ತಾ, ತಮಗೆ ಧ್ಯಾನದ ವಾತಾವರಣ ನೀಡಿದ `ಅಕ್ಷರ' ಪ್ರಕಾಶನವನ್ನು ನೆನೆದರು. ಕಾರ್ಯಕ್ರಮದ ನಂತರ ಗಾಂಧಿ-ಬಜಾರದ ಅಂದಿನ ತೇವದ ವಾತಾವರಣದಲ್ಲಿ ಕಾಫಿ, ಸ್ನೇಹದ ಮಾತುಗಳು ಎಲ್ಲವೂ ಚುರುಕಾಗಿದ್ದವು.

ಕಥಾ ಸಂಕಲನದ ಕತೆಗಳ ಬಗ್ಗೆ ಒಂದೆರಡು ಮಾತು:

ಅನುಭವದ ಗಾಢತೆಯನ್ನು ಓದುಗನಿಗೆ ಅಷ್ಟೇ ಗಾಢವಾಗಿ ತಲುಪಿಸಲು ತುಡಿಯುವುದು, ಸಮಾಜದ ನಿತ್ಯದ ಬದುಕಿನಲ್ಲಿ ಪಾತ್ರಗಳು ನಿರ್ವಹಿಸುವ ವ್ಯಕ್ತಿತ್ವಕ್ಕಿಂತ ಭಿನ್ನ ವ್ಯಕ್ತಿತ್ವಗಳನ್ನು ಅನಾವರಣಗೊಳಿಸುವುದು, ವ್ಯಕ್ತಿತ್ವ, ಕುಟುಂಬ, ಸಮುದಾಯದ ವಿಘಟನೆಯ `ಕಾರಣ'ಗಳನ್ನು ಹುಡುಕುವುದು, ಇಂದು ಪ್ರಬಲವಿರುವ `ದೇಶ-ಕಾಲ'ದ ಪರಿಕಲ್ಪನೆಗಿಂತಲೂ ಭಿನ್ನವಾದ ಪರಿಕಲ್ಪನೆ ಹೊಂದಿರುವ ಪಾತ್ರಗಳನ್ನು ಬೆಳಕಿಗೆ ತಂದು ಪ್ರಜಾಪ್ರಭುತ್ವದಲ್ಲಿ ಅವುಗಳಿಗೆ ದನಿ ಕೊಡುವುದು, ಇವೇ ಮೊದಲಾದವು ವಿವೇಕ್‍ರ ಈ ಕಥಾಸಂಕಲನದಲ್ಲಿ ಅಡಕವಾಗಿರುವ ಕಥೆಗಳ ವೈಶಿಷ್ಟ್ಯ. ಗಾಢವಾಗಿ ತಟ್ಟುವ ಕಥೆ `ಕಾರಣ', ಆಧುನಿಕ ನಾಗರೀಕತೆಯಲ್ಲಿ ಬದುಕು ನಿರ್ವಹಣೆಗಾಗಿ ವಿಭಿನ್ನ ನಂಬಿಕೆಗಳನ್ನು ಆಧರಿಸಿ ಸೆಣಸುವುದನ್ನು ನವಿರು ಹಾಸ್ಯ, ಸಂವೇದನೆಗಳು ಹದಗೆಡದಂತೆ ನಿರ್ವಹಿಸಿ ಯಶಸ್ವಿಯಾಗುವ ಕಥೆ `ಶರವಣ ಸರ್ವೀಸಸ್', ತನ್ನ ಕನಸಿನ ಕಥೆಗಳಿಂದ ವಾಸ್ತವದ ಬದುಕನ್ನು, ಸುತ್ತಲಿನ ಸಮಾಜವನ್ನೂ ನಿರ್ವಹಿಸುವ ಜನ್ನನ ಕಥೆ `ಸರಹದ್ದು' ಇವು ಬಹಳ ಹಿಡಿಸಿದವು. ಇನ್ನೂ ಕೆಲವು ಕಥೆಗಳನ್ನು ನಾನು ಓದಬೇಕಿದೆ. ಅವುಗಳ ಬಗ್ಗೆ ಇನ್ಯಾವಾಗಲಾದರೂ...